...Sen o periodismo valente, ese que
mantén a súa independencia de criterio por riba de factores de
supervivencia ou razóns egoístas, o terrorismo de Estado tería
imposto, hai xa moito tempo, unha nova orde social. Vai camiño dilo.
As reformas neoconservadoras dos últimos anos afondan na
estruturación da sociedade en castas ben diferenciadas, sen
permeabilidade. Os medios de comunicación tradicionais teñen
secuestrada a capacidade de crítica ao abuso oligárquico pola
filosofía das subvencións en mans dos dirixentes corruptos e
nepotistas. Na internet aínda sobreviven periodistas de raza,
sostidos pola súa motivación. Son unha estirpe esforzada de
entregados á causa da defensa das liberdades, da pluralidade e do
exercicio do xuízo crítico máis aló da tentación sectaria que
aleita aos cachorros do involucionismo.
Cando acudo a conferenciar nas
Facultades de Periodismo de todo o mundo adoito dar máis peso ao
coloquio que á disertación. Interésame saber da súa ética, das
súas expectativas, soños, ilusións... Con demasiada frecuencia
queren levarme pola senda do debate sobre soportes, formatos,
dixitalización e non sei cantos farrapos de gaitas mais. Pero eu
dígolles a todos que tan vangardistas son o lapis e o papel como a
tablet. O importante é transmitir cultura para discernir os focos de
interese fronte ao ruído prescindible ou baleiro de contido. Trátase
de desenvolver ferramentas que axuden a aplicar a observación e a
capacidade analítica sen ceder á tentación do prexuízo e a visión
monolítica. Algúns dos grandes exemplos de conversos á pluralidade
e a diverxencia téñense producido logo de viaxes iniciáticas, de
experiencias osmóticas dos periodistas no seo das sociedades obxecto
da súa observación. Eu son un firme defensor da tese que sostén a
necesidade absoluta da participación na política da xuventude para
frear a tendencia totalitaria e mesiánica das cepas de políticos
con unha traxectoria longa, exposta a un exercicio duradeiro de
fluxos e intercambios de intereses.
(Fragmento de "Tractatus... ". Inédito).
No hay comentarios:
Publicar un comentario